للاسف هذا اللي وصلناه ........... يالعلمانيه

للاسف هذا اللي وصلناه ........... يالعلمانيه

قبل اسبوع ، كنت قاعد مع شباب يتخذون الفكر العلماني ( سبيل لإيصالهم لمبتغاهم و غايتهم دون ايمانهم بولا شي من مبادئ العلمانيه ) ومع الاسف في مجتمعنا هذا معظم متبعين العلمانيه او الليبراليه هذا هو فكرهم، شديت حيلي شوي وقعدت احكي لهم شنو هو الفكر اللي يتخذونه وضربت امثله بكبار العلمانين من العرب على راسهم بوعلي ياسين و انطون سعادة وفرح انطون، والكل كان مستغرب من كلامي قلت ان فرح انطون كان يحترم الاديان السماويه ويطلب ان تشارك في سياسة الدوله مع عدم تحديد دين عام لدوله واستغربت اكثر لما دريت ان واحد منهم ما يدري ان العلمانيه تطالب بعدم تحديد دين عام للدوله:

وقالي بالحرف الواحد

العلمانيه تطالب بعدم تحديد الدين العام لدوله ؟!

ابتسمت ابتسامه خفيفه

قلت له من شنو تقول اذا دريت ان علي الساعي ( مفكر علماني تونسي ) يطالب بأن نعيش دون دين وان اي حاكم يطالب بمسك الحكم لازم يكون ملحد ( وهذي نوعية من انواع العلمانيه الحديثه تسمى باللحاديه ) ما اقدر اوصف لكم شنو كان شعوري وانا اسمع سؤاله الثاني :

هل للعلمانيه انواع ؟

هالمره التفت على اللي حولي - حوالي خمسه و سادسهم اللي سأل السؤال - من الخمسه اللي موجودين ولا واحد جاوب الا واحد حسسني ان فيهم امل وقاله انت ما تعرف ان العلمانيه نوعين ( جزئيه وشامله ).

ما اقدر اوصف لكم شنو سعادتي لما حسيت ان في شويت موؤازه منهم، قلت له صحيح كلام اخوي/ علي العلمانيه تختلف باختلاف انواعها و تقسيماتها فيها اللي يقسم على حسب تعصب الشخص لفكره العلماني الى حاد ولين ( والحاد هو اللي يعتبر فكره فكر مقدس ممكن يوصله مرحلة الدين ويحارب اي شي سواه اما اللينه فهو الشخص اللي ما يدخل دينه على فكره ويعتبر كل واحد منهم شي لازم ما يتعارضون نهائياً ) وفي تقسيم يقسم على اساس الحريه المتبعه فهناك علمانيه ليبراليه ( وهي اقرب للعلمانيه ويكون وجه الشبه الوحيد اللي يربطها بالليبراليه هو احترام الحريات الاخرى واكبر مثال عليها الحجاب في تركيا فهالنوعيه تسمح بارتداء الحجاب) وفي تقسيم على اساس القضايا اللي تناقش وتقسم لجزئيه وعامه او شامله و انواع التقسيمات كثيره وكبيره ممكن توصل لي اكثر من هالانواع.

رديت بعدها ليش تتخذون العلمانيه اذا انتوا ما تعرفون شنو اهي العلمانيه ؟!!

ما كان في ايجابه الا من شخص صور لي حال معظم متبعين العلمانيه في الكويت ( والعالم العربي بصفه عامه ) وقالي العلمانيه ستايل تقليدي للغرب مسماه حلو وذكر انه انتهج هالفكر مو ايمان فيه ولكن حبا للتغير ومخالفة المجتمع.

اهني حسيت بضيق بصدري

اشلون وصل الحال بالعلمانيه من فكر كان اساس تقدم اوروبا وانتفاضت اميركا الى ستايل يتخذه البعض للوصول لمبغاهم سواء سياسين او حتى الشباب وجيل الغد

مسكينه يالعلمانيه

والاهم مسكينه يا كويت على هالنوعية من الشعب